Т. Рысқұлов атындағы жалпы орта мектебінде жасөспірімдер арасында өзара сыйластықты нығайту мен зорлық-зомбылықтың алдын алу, құқықтық сауаттылығын арттыру мақсатында маңызды кездесу өтті.
«Кездесуге Кентау қалалық полиция бөлімінің қызметкерлері М. Құттыбаева мен Г. Жақсылықова, «Отбасын қолдау орталығы» КММ-нің әлеуметтік қызметкерлері Н. Оспанова мен Б. Индира, «Кентау қалалық аналар кеңесінің» төрайымы М. Қазыбаева, «Алау» медицина орталығының басшысы Р. Үтебаева, психолог Н. Смайлова, «Жастар ресурстық орталығы» КММ-нің заңгері Б. Шакиров, сондай-ақ мектеп өкілдері А. Үтеева мен Г. Ниятова қатысты» деп хабарлайды Түркістан облысы ПД баспасөз қызметі.
Іс-шара барысында оқушылармен «Менің отбасым — сыйластық орнаған ортам», «Әйелдер мен кәмелетке толмағандарға қарсы зорлық-зомбылықтың алдын алу» мен буллинг пен лудоманияның зияны туралы тақырыптар талқыланды.
100-ге жуық оқушыны қамтыған кездесудің басты мақсаты — мектеп оқушылары арасында өзара сыйластықты нығайту, отбасылық құндылықтарды дәріптеу, буллинг пен ойынқұмарлықтың алдын алу, сондай-ақ жасөспірімдерге зорлық-зомбылықтың зияны туралы түсіндіру болды.
