Республикалық «Қару» жедел-профилактикалық іс-шарасын өткізу барысында Түркістан облысы полиция департаментінің криминалдық полиция қызметкерлері тіркелмеген 37 қаруды тәркіледі. Оның ішінде 27 тегіс ұңғылы қару, 6 газ тапаншасы, 3 шолақ және 1 травматикалық тапанша, сондай-ақ түрлі калибрлі 50 оқ-дәрі бар.
Мәселен Төлеби ауданында полицейлер жергілікті тұрғыннан тиісті құжаттары жоқ аңшылық шолақ мылтықты анықтады. Тәркіленген қару сараптамаға жіберілді. Тіркелген дерек бойынша тергеу жүргізіліп жатыр. Сонымен қатар іс-шара барысында тәртіп сақшылары қаруды сақтау ережелерін бұзудың 30-дан астам фактісін анықтады.
Полицейлер құқық бұзған азаматтарға тиісті шара қолданды. Тәртіп сақшылары қарумен жасалатын қылмыстардың алдын алу және азаматтардың құқықтық сауатын арттыруға бағытталғанын іс-шараларды тұрақты түрде жүргізіп келеді.
Түркістан облысы ПД баспасөз қызметі
