Жасөспірімдер арасындағы құқық бұзушылықтың алдын алу және олардың қауіпсіздігін қамтамасыз ету мақсатында Түркістан облысы аумағында «Жасөспірім» жедел-профилактикалық іс-шарасы жүргізілуде.
Аталған іс-шара шеңберінде Арыс аудандық полиция бөлімінің және аудандық Жастар орталығының қызметкерлері бірлесіп, түнгі уақытта рейдтік жұмыстар ұйымдастырды.
Рейд барысында кәмелетке толмағандардың түнгі уақытта (сағат 22:00-ден 06:00-ге дейін) заңды өкілінсіз ойын-сауық орындарында болуына жол берген 1 ойынханаға, 21 жасқа толмаған адамға алкоголь өнімін сатқан дүкен иесі мен түнгі уақытта заңды өкілінсіз жүрген 15 жасөспірімнің ата-анасына әкімшілік шара көрілді.
Мұндай іс-шаралар кәмелетке толмағандардың қауіпсіздігін қамтамасыз етіп қана қоймай, олардың құқықтық сауаттылығын арттыруға және қоғамда құқықтық мәдениетті қалыптастыруға бағытталған.
Түркістан облысы ПД баспасөз қызметі
