Түркістан облысы Полиция департаментінің Көші-қон қызметі басқармасының басшысы Аида Смағұл, Қ.Яссауи атындағы халықаралық қазақ-түрік университетінің шетелдік студенттерімен арнайы кездесіп, маңызды ақпарат берді. Яғни «Заң мен тәртіп» қағидаты аясында Қазақстан Республикасының көші-қон заңнамасын кеңінен таныстырды.
Жиын барысында полиция подполковнигі Аида Смағұл: «Әрбір шетелдік азамат тіркелген мекенжайы бойынша, яғни визада немесе ресми көрсетілген мекенжайда міндетті түрде тұруы тиіс. Егер ол мекенжайда тұрмайтын болса, көші-қон талаптарын бұзғаны үшін тиісті шаралар қолданылады. Ал мекенжайы өзгерген жағдайда үш күн ішінде деканатқа хабар беруге міндетті», – деп атап өтті.
Шара барысында Қазақстанда білім алып жатқан шетелдік студенттердің құқықтары, көші-қон заңын сақтау тәртібі, уақытша тіркеу талаптары, ҚР аумағындағы тәртіп пен визаға қатысты мәселелер жан-жақты қарастырылды.
Жиын соңында студенттер көкейлеріндегі сұрақтарын қойып, толыққанды жауап алды.
Оқу орнының Қаржы және халықаралық байланыстар вице-ректоры Мустафа Гиритлиоглу: «Студенттерімізді қажетті ақпаратпен қамтамасыз ету – маңызды міндеттердің бірі. Бүгін арнайы келіп, көші-қон жөнінде маңызды ақпарат ұсынғаны үшін полиция өкілдеріне алғыс білдіреміз!», – деді.
Айта кетсек, бұл университет – түркі дүниесінің жастарын бір шаңырақ астына біріктірген білім ордасы. Бұл жерде әлемнің 17 елінен келген 30-дан астам ұлт пен ұлыстың өкілдері бірге білім алуда.
Түркістан облысы ПД баспасөз қызметі
