Түркістан облысында құқық қорғау органдары азаматтарды алаяқтықтан қорғауға ерекше назар аударуда. Осы орайда полицейлер медицина қызметкерлерімен интернет-алаяқтыққа қарсы кездесу өткізді. Бұл туралы Түркістан облысы ПД баспасөз қызметі хабарлады.
«Кентау қалалық полиция бөлімінің бастығының бірінші орынбасары Азамат Сарсенкулов пен қалалық ПБ жедел уәкілі Ж. Байзақ Кентау қалалық ауруханасының қызметкерлерімен интернет-алаяқтықтың алдын алу бағытында ауқымды профилактикалық жиналыс өткізді» дейді баспасөз хабарламасында.
Жиынға қатысушыларға жеке деректерді қорғау, банк карталарының реквизиттерін бөгде тұлғаларға бермеу, күмәнді сілтемелерге өтпеу және белгісіз нөмірлерден келетін қоңырауларға сенбеу туралы нақты профилактикалық кеңестер ұсынылды.
«Іс-шара барысында алаяқтықтың кең таралған түрлері, оның ішінде жалған сайттар, өзін банк қызметкері ретінде таныстырып қоңырау шалу, әлеуметтік желілер арқылы жасалатын алаяқтық және жалған инвестициялық ұсыныстар жөнінде жан-жақты ақпарат берілді» деп хабарлайды ПД баспасөз қызметі.
habarlike.kz
