Түркістан облысы ПД баспасөз қызметі Кентау қаласында жол қауіпсіздігіне бағытталған шаралар күшейтілгенін хабарлайды.
«Жол қозғалысы ережелерінің сақталуын бақылау, жол-көлік оқиғаларының алдын алу және жүргізушілер арасында құқықтық мәдениетті арттыру мақсатында Кентау қаласында “Қауіпсіз жол” алдын алу іс-шарасы өткізілуде» делінген баспасөз хабарламасында.
Шара барысында қаланың негізгі көшелерінде және оған қарасты елді мекендерде рейдтік тексерістер ұйымдастырылып, жол қозғалысын қадағалау күшейтілді. Жол-көлік оқиғаларының алдын алу үшін “жол тарылту” әдісі қолданылып, жүргізушілерге арнайы ақпараттық брошюралар таратылып, түсіндіру жұмыстары жүргізілді.
Сонымен қатар қалаішілік және қала-аудан бағытында жолаушы тасымалымен айналысатын жүргізушілермен де профилактикалық әңгімелер жүргізіліп, қауіпсіздік талаптарын сақтау қажеттілігі ескертілді.
Осы тұста жалпы 156 әкімшілік шара көрілді. Оның ішінде 2 жүргізушіге мас күйінде көлік басқарғаны үшін, қарама-қарсы жолаққа шыққан 1 жүргізушіге шара қолданылып, 12 көлік айыптұраққа қойылған.
П.Мырза.
