Отырар ауданының прокуратурасының ұйымдастыруымен 2026 жылғы 23 қаңтарда интернет алаяқтықтың алдын алуға бағытталған профилактикалық жұмыстар жүргізілді.
Интернет алаяқтық фактілерінің көбеюіне байланысты аудан прокуратурасы тарапынан алдын алу шаралары күшейтілуде. Осы орайда аудан прокуратурасының аға прокуроры Мақсат Абдукаримов аудандық полиция бөлімінің қызметкерлерімен жұмыс кездесуін өткізді.
Кездесу барысында интернет алаяқтықтың алдын алу, құқықбұзушылықтардың жолын кесу және азаматтардың құқықтық сауаттылығын арттыру мәселелері талқыланды. Прокурор полиция қызметкерлеріне профилактикалық жұмыстарды күшейту, тұрғындармен тікелей байланыс орнату, сондай-ақ алаяқтықтың кең таралған түрлері туралы халыққа уақтылы ақпарат беріп отыру жөнінде нақты тапсырмалар жүктеді.
Кездесу қорытындысы бойынша прокуратура және полиция қызметкерлері бірлесіп аудан тұрғындары арасында ақпараттық-түсіндіру жұмыстарын жүргізді. Тұрғындарға интернет алаяқтықтың негізгі түрлері, күмәнді сілтемелер мен қоңыраулардан сақтану жолдары, жеке деректерді қорғау және алаяқтық фактілері орын алған жағдайда құқық қорғау органдарына жедел хабарласу қажеттігі түсіндірілді.
Аудан прокуратурасы алдағы уақытта да құқықбұзушылықтардың, оның ішінде интернет алаяқтықтың алдын алуға бағытталған профилактикалық іс-шараларды жүйелі түрде жалғастыратын болады.
