«Жетісай полициясы: тіркелген қылмыстардың саны 5,3%-ға төмендеді» деп хабарлайды Түркістан облысы ПД баспасөз қызметі.
Жетісай аудандық полиция бөлімінде 2025 жылдың 12 айында атқарылған жедел-қызметтік жұмыстардың қорытындысы бойынша есеп беру жиыны өтті. Шараға Түркістан облысы полиция департаменті бастығының орынбасары, Бағланбек Айтпаев, аудандық полиция бөлімінің бастығы Мұрат Ермеков пен полиция бөлімінің жеке құрамы қатысты.
«Есептік кезеңде қылмыспен күресті күшейту, қоғамдық тәртіп пен азаматтардың қауіпсіздігін қамтамасыз ету бағытында кешенді ұйымдастыру және профилактикалық шаралар жүзеге асырылды. Атқарылған жұмыстардың нәтижесінде аудан аумағында тіркелген қылмыстардың жалпы саны 5,3 пайызға азайған» дейді баспасөз қызметінің хабарламасында.
Профилактикалық шаралардың тиімді жүргізілуі қоғамдық орындарда және көшелерде жасалатын қылмыстардың азаюына оң әсерін тигізді. Сондай-ақ қылмыскерлерді іздестіру бағытындағы жұмыстардың нәтижесінде 2025 жылы 12 қылмыскер құрықталып, бұл көрсеткіш өткен жылмен салыстырғанда 18,1 пайызға жақсарды.
Жиын барысында полиция қызметкерлерінің алдағы кезеңге арналған негізгі міндеттері айқындалып, қоғамдық тәртіпті сақтау мен азаматтардың қауіпсіздігін қамтамасыз ету бағытындағы жұмыстарды одан әрі күшейту қажеттігі атап өтілді.
