Интернет кеңістігіндегі алаяқтық фактілердің алдын алу мақсатында Төлеби аудандық полиция бөлімінің қызметкерлері тұрғындар арасында жүйелі түрде түсіндірме жұмыстарын жүргізіп келеді.
Полиция қызметкерлері халық көп шоғырланатын орындарда, түрлі жиналыстар мен жұма намаздары кезінде азаматтармен кездесіп, интернет арқылы жасалатын қылмыстардан сақтану шаралары жөнінде ақпарат берді.
Шара барысында тұрғындарға сақтық ережелері түсіндіріліп, интернеттегі күмәнді сілтемелер мен бейтаныс тұлғалардан келетін хабарламаларға сенбеу қажеттігі ескертілді. Сонымен қатар, азаматтарға арнайы жадынамалар мен үнпарақтар таратылып, онлайн алаяқтықтың түрлері мен оны болдырмау жолдары көрсетілді.
Полиция өкілдері тұрғындарды интернеттегі күдікті жағдайлар туралы дереу «102» нөміріне хабарлауға шақырып, өз қауіпсіздігін қамтамасыз ету – әрбір азаматтың басты міндеті екенін атап өтті.
Түркістан облысы ПД баспасөз қызметі
