2025 жылғы 4-5 желтоқсан күндері Түркістан қаласында Қожа Ахмет Ясауи атындағы Халықаралық қазақ-түрік университетінің ұйымдастыруымен “Ұлы дала философиясы және құқықтық мәдениет” халықаралық симпозиумы өтті.
Симпозиум жұмысына құқық қорғау органдарының басшылары, белгілі ғалымдар мен сарапшылар қатысты.
Іс-шараның негізгі мақсаты – түркі өркениетінің құқықтық және философиялық мұрасын талдау арқылы қазіргі заманғы мемлекет пен құқықтың дамуына жаңа ғылыми көзқарас қалыптастыру және рухани-құқықтық құндылықтардың сабақтастығын айқындау.
Түркістан облысының прокуроры Мұрат Тлеубердиев симпозиум барысында сөйлеген сөзінде ұлттық болмыс пен құқықтық мәдениеттің өзара сабақтастығын атап өтіп, қазақтың дәстүрлі құқық жүйесінен бастау алатын құқықтық құндылықтар қазіргі Конституцияда өз жалғасын тапқанын жеткізді.
Іс-шара аясында “Түркі әлеміндегі әділет дәстүрі және құқық мұрасы”, “Далалық құқық философиясы” секциялары, сондай-ақ “Ұлы дала мұрасынан жаңа мемлекетшілдік қағидаттарына дейін” атты дөңгелек үстел ұйымдастырылды. СекциялардаЯсауи мұрасы, көшпелілердің құқықтықмәдениеті, түркі өркениетіндегіморальдық-құқықтық негіздер мен дәстүрлі құқық жүйесі жөнінде ғылыми баяндамалар ұсынылды.
Симпозиум қорытындысында қатысушылар Түркі өркениетінің рухани-мәдени мұралары қазіргі заманғы құқықтық ойды дамытуда маңызды рөл атқаруы тиіс екенін атап өтті.
Іс-шара мәдени бағдарлама – Абайдың “Қара сөз” балетінің қойылымымен аяқталды.
П. Арыс.
