«Заң мен тәртіп» қағидатын іске асыру аясында Созақ аудандық полиция бөлімі мен «Сағындық» шахмат клубының ұйымдастыруымен жастар арасында құқық бұзушылықтың және нашақорлықтың алдын алу мақсатында дәстүрлі облыстық квалификациялық ашық шахмат біріншілігі өткізілді. Бұл туралы Түркістан облысы ПД баспасөз қызметі хабарлады.
Іс-шара Сызған ауылындағы Ғ.Мұратбаев атындағы жалпы орта мектепте ұйымдастырылып, жасөспірімдерді спортқа баулу, салауатты өмір салтын насихаттау және құқықтық мәдениетті арттыруды көздеді.
Жарыс қорытындысы бойынша үздік шыққан қатысушылар Созақ аудандық полиция бөлімі бастығының атынан грамоталармен және медальдармен марапатталды.
