«Түркістан облысы аумағында өткізіліп жатқан “Жасөспірім” жедел-профилактикалық іс-шарасы аясында Сарыағаш аудандық полиция басқармасында оқушылармен кездесу ұйымдастырылды» деп хабарлайды habarlike.kz Түркістан облысы ПД баспасөз қызметіне сілтеме жасап.
Аталған шараның мақсаты – мектеп оқушылары арасында құқықбұзушылықтың алдын алу, қылмыстың өсуіне жол бермеу, сондай-ақ жасөспірімдердің құқықтық сауаттылығын және мәдениетін арттыру болып табылады. Осыған орайда полиция басқармасы ғимаратында аудандық білім бөліміне қарасты мектептің 151-ге жуық “көшбасшы” оқушыларының қатысуымен танымдық кездесу өтті.
Іс-шара барысында оқушылар уақытша ұстау изоляторы мен әкімшілік арнайы қабылдау орнының жұмысымен танысып, құқық қорғау органдарының қызметі туралы толық ақпарат алды. Сонымен қатар полиция қызметкерлері тарапынан анонимді сауалнамалар жүргізіліп, жеке сұхбаттар ұйымдастырылды және құқықтық тақырыптағы бейнероликтер көрсетілді.
Шара соңында оқушыларға заң талаптары кеңінен түсіндіріліп, құқықтық мәдениетті қалыптастырудың маңыздылығы атап өтілді.
